磐田「封殺中村」頂住水手

猪拉多纳

咪以為降班球隊一定冇鬥志，上輪响日職輸咗畀鳥棲，來季歷史性首次降落日乙嘅磐田山葉，決心為面子而戰，今日主場對住「一哥」橫濱水手未必任砌，磐田2.02倍「讓球主勝」抵博。

（有線62、202周六下午1:00直播）

從常理上去講，磐田降班成咗定局，水手就要爭日職冠軍，戰意一定係後者旺盛啲。不過人要面樹要皮，磐田話晒傳統豪門，仲要係嚟自日本足球之鄉靜岡縣，衰到淪落日乙都仲放軟手腳嘅話，班擁躉拆咗個球場都似，所以今日唔輪到佢哋唔搏。
水手鋒力唔強

水手家陣喺日職只得1分優勢，今日失分嘅話，隨時畀浦和、廣島甚至鹿島爬頭，自不然會打甩髀。弊在早排膽囊炎攤咗响醫院成個禮拜嘅中村俊輔，上場波喺日皇盃對長野雖然復出，但佢狀態一般，水手攻擊力又唔強，又完全靠馬昆奴斯、中村兩個搵食，磐田就係睇準佢哋呢一點，度定咗套「封殺中村」戰術，希望將水手由「一哥」個位拉落嚟，等自己光榮「降班」。何況磐田過去聯賽、盃賽10次喺山葉球場對水手，只係輸過3次咁大把，今日偷到雞唔奇，受讓自然博得過。