朗尼尹佩斯開行火 曼聯攻城Easy win

猪拉多纳

5戰全勝喪入20球

今季由莫耶斯帶領嘅曼聯開局極差，寫下球會24年嚟最差開季成績，不過睇嚟「紅魔鬼」已經開始適應呢個轉變，最近表現終於回升，喺近3場聯賽拎足9分，又重燃衞冕希望，就連朗尼都話要喺聖誕前追上榜首！今晚佢哋造訪卡迪夫城，贏波可以話係冇難度，一於捧曼聯客Win！

曼聯最近3場聯賽贏晒，包括上仗對住榜首嘅阿仙奴小勝1:0，全隊士氣返晒嚟。雖然菲爾鍾斯喺國際賽期為英格蘭踢太公波嗰陣整傷鼠蹊，要抖成10日，今晚場聯賽同對利華古遜嘅歐聯大戰都唔使預佢；另一中場卡域克同樣受傷，預計要抖多5個禮拜，好在佢哋仲有湯卡華利、傑斯、路爾斯安達臣同費蘭尼等猛將，質素仍然贏卡迪夫城一大截！
香川真司有貨交

紅魔最煞食嘅係，朗尼同尹佩斯呢對箭頭狀態大勇，伊佩斯更加連續3場有波入添！加上「東瀛發電機」香川真司解凍後復任正選愈踢愈好，連帶後備殺手查維亞靴南迪斯都不斷交貨，呢支英超勁旅嘅進攻火力終於回復上季拎冠軍嘅霸氣！
卡城主場靠唔住

卡迪夫城上輪聯賽輸畀阿士東維拉，近5場聯賽只係贏過一場「威爾斯打吡」，隊中主力比拿美已經34歲，體力有限，單靠智利國腳加利美度又點夠曼聯踢？今晚就算有主場之利都無用啦，事關卡迪夫城今季主場成績認真麻麻，5場主場比賽只得2勝1和2負成績，所以睇怕今晚佢哋對住殺氣騰騰嘅曼聯，都係凶多吉少，一於捧曼聯客W！