長崎為Fans搶攻德島

猪拉多纳

日乙今日煞科，最大焦點自不然係邊4隊攞到升班附加賽資格，當中「四哥」長崎成功丸主場迎戰「六哥」德島漩渦，更加係最有瞄頭嘅生死戰，呢啲等同決賽嘅交鋒，唔使諗梗係主隊着數，博1.78倍長崎小讓平半上盤啦。

（開賽時間：周日上午11:30）
德島漩渦爭升班附加資格焗攻

從形勢上嚟講，日乙升班、降班已成定局，唯獨升班附加賽4個席位就爭崩頭，由第3至第8名嘅京都、長崎、千葉、德島、札幌以至松本都有Chance，好似排第6嘅德島咁，佢領先札幌、松本只係1分，今場和都可能入唔到前6名，焗住佢哋要攞3分做目標，絕對係背水一戰，唔攻就玩完，弊在佢哋件前鋒鈴木達也爆咗面骨抖6個星期，怕且攻得嚟都未必好大威脅。

長崎嘅情況好好多，佢哋有66分，理論上和波都掂，而且呢班波向來後防穩陣見稱，所以一般估計長崎都會以守為攻。問題係佢哋個主帥高木琢也踢過唔少大賽，呢位前日本國腳深知求1分，往往會一無所有，所以佢度好晒用雙箭頭打突擊，起碼到入咗球波至縮都未遲。

由於今場波唔單只係有無資格爭升班嘅大戰，仲係長崎籌募「加油基金」嘅大日子，佢哋都想氹得啲Fans開開心心，又點會死守咁衰仔吖？