西維爾主場大「斯」殺

猪拉多纳

今晚西維爾會喺西甲主場迎戰榜尾嘅貝迪斯，合演塞維利亞打吡。今季有主力離隊嘅西維爾，雖然整體實力無上季咁好，但係每次喺主場出擊水準都幾穩定，撞着今季走晒樣嘅宿敵貝迪斯，仲唔趁佢病攞佢命，大炒一場咩！一於撐2.53倍「讓主」。

（開賽時間：周一凌晨4:00）
貝迪斯作客腳軟

西維爾主力捷西斯拿華斯同尼格度今季齊齊過檔曼城，幸影響比預期細。前線嘅卡路士巴卡、拿傑迪錫同加美路喺聯賽夾埋入咗16球，呢個進攻鐵三角愈見默契，成隊波聯賽入23球只係僅次榜首三雄，相信今晚要喺貝迪斯條豆腐防線身上取得入球唔係一件難事。

貝迪斯暫時位列榜尾，唔多唔少同佢哋今季要兼顧歐洲賽有關，就好似下周中佢哋又有場對里昂嘅歐霸爭出線大戰，今晚淨係諗留唔留力都有排煩。另一個戰績下滑致命原因，係因為佢哋作客戰績特差，踢咗6場先得1分，相反主場就搶到8分，今晚對住出名主場強勁嘅西維爾，仲邊會有運行吖！