祖記留力歐聯一粒割「禾」

猪拉多纳

隨住「一哥」羅馬連續兩場意甲和波失分，祖雲達斯又夠爭氣取得聯賽4連勝，雙方喺積分榜差距已收窄至1分，照道理「斑馬軍團」今晚會乘勇作客撲殺利禾奴進一步進逼榜首，不過顧及周中要分心歐聯，個別主力好可能踢唔足，而今季聯賽作客未試贏多過一粒，不如冷敲3.45倍「讓球和」。

（TVB301台周日晚10:00直播）
利禾奴射手保連奴停賽

祖雲達斯今日雖有一對中堅邦路斯、奧邦拿坐波監，慶幸鐵衞基亞連尼傷愈歸隊，總算將防線影響減至最低，加上中場大將維達爾、馬治斯奧雙雙候命，配合漸入佳境嘅前鋒洛蘭迪同星級射手泰維斯，足以攻破對手大門。問題係「斑馬軍團」今季歐聯表現令人失望，暫時喺B組得3分揸手排緊榜尾，正陷入出局邊緣。需知道歐聯收入豐厚，就算佢哋嚟緊只係喺主場對哥本哈根，相信亦唔敢掉以輕心，以免提早「畢業」影響球會財政收入，今仗贏一球就留力等完場有乜咁出奇。

即使祖雲達斯唔出盡全力，但以利禾奴嘅人腳，同埋近7戰輸咗5場嘅差勁狀態，今仗要搶分希望亦唔大。況且佢哋陣中首席射手保連奴要停賽，中場主力魯賓保達又未好番，怕且都幾難威脅到「斑馬軍團」大門。再睇埋佢哋今季對住羅馬、拿玻里等前列勁旅都係任人魚肉，今仗都係難有寄望。