法蘭克福Hea住歎細界

猪拉多纳

1分都收貨唔使咁搏

歐霸盃德甲雙雄法蘭克福、弗賴堡各走極端，法蘭克福位居F組榜首，出線機會樂觀，爭勝鬥心成疑，而且球隊近況差，作客對波爾多唔敢奢望全取3分，預料會主守，博攞1分，建議要細。至於H組弗賴堡作客捷克利巴域，屬於爭出線「6分波」，雙方勢必搏槌，大盤可取。

法蘭克福贏波就肯定可以出線，但問題係狀態低迷，近8仗僅1勝3和4負，想贏並非易事，與其冒險硬拚，不如穩守力保不敗，維持晉級優勢。至於法甲球隊波爾多喺小組排包尾，出線機會渺茫，加上歐霸盃吸引力有限，睇怕波爾多唔會作無謂掙扎，留力踢好聯賽更上算。

（有線64及203台周五凌晨4時05分直播）
弗賴堡利巴域大駁火

另一場弗賴堡落後次席利巴域3分，由於首循環雙方打和，換言之弗軍今場只要贏波，就可以憑較佳對賽成績，反超前利巴域，名副其實嘅「6分波」點都搏埋佢，作客肯定照攻。利巴域一向攻強守弱，上次作客弗賴堡先失兩球，最終都可以扳平，而且利巴域兩鬥西甲球隊西維爾亦唔使輸，今仗無懼同弗賴堡駁火，捧大盤穩陣。

（有線63台周五凌晨2時直播）