天鵝起飛打殘華倫

猪拉多纳

射手韋菲特邦尼踼愈掂

歐霸盃分組賽第5輪今晚上演關鍵大戰，英超「天鵝」史雲斯喺A組主場迎擊已經出線嘅西甲華倫西亞，只有贏波先可以提早出線，鬥志唔使懷疑。最緊要係「天鵝」射手韋菲特邦尼已融入球隊，出任柱躉中鋒愈踢愈順，史雲斯讓平半唔算多，捧1.8倍上盤！

（有線61及201、廣東體育周五凌晨4:05直播）
史雲斯米捷 魯迪治有傷

其實如果今晚早場同組嘅古賓同聖加倫打和，史雲斯就可以兵不血刃提早出線，不過一旦佢哋分出勝負，「天鵝」又失分嘅話，就隨時要等最後一輪出訪聖加倫先知出線命運。為免夜長夢多，史雲斯想入32強最簡單就係今仗做低「蝙蝠軍團」。

當然「天鵝」搞到依家都未出線，唔多唔少係自己攞嚟，事關之前2輪分別主客場鬥古賓，都係臨天光瀨尿畀對手逼和失分，否則依家小組一哥已經係佢。不過點都好，吸取過教訓後，今仗肯定會由頭搏到尾，既然今年9月作客華倫都可以贏波，今晚主場出擊要再贏又有幾難？

人腳方面，前鋒米捷同魯迪治都因傷缺陣，中場柏保路靴南迪斯啱啱傷愈頂盡做後備，好彩係前線有貴價新兵韋菲特邦尼孭飛，佢今季加盟「天鵝」上陣19場就入咗10球，近3戰就入咗3球，絕對信得過o架。
華倫出咗線戰意成疑

華倫目前排小組首席出咗線，今晚鬥志成疑。唔係講笑，上周佢哋喺西甲輸畀艾爾切，聯賽排名跌到落11位，嚟緊周一凌晨對奧沙辛拿自然不容有失，今晚仲會唔會「夫添」出擊真係難講，依家仲要遇上對3分志在必得嘅史雲斯，輸少當贏啦！
歐霸盃A組

Data King：華倫訪英倫少贏波

華倫西亞歷來16次作客英格蘭只得2勝9和5負。

史雲斯今季歐霸主場4戰得3勝1和。

華倫西亞前4輪共30次射門命中目標，冠絕歐霸群雄。
乜都玩錦囊：半場勒住踢捧半和

雖然話史雲斯求贏波出線，不過面對實力分子華倫西亞，相信唔會一開波就冒險搶攻，至於客隊和波冇壞，隨時勒住踢，睇怕上半場唔易分勝負。睇數據，主隊近7場有5次開「半場和」，華倫更係連續3仗半場同對手不分勝負，今仗「半場和」有2.08倍可以諗諗。