帕爾馬靠卡斯辛奴食胡

猪拉多纳

卡斯辛奴果然係大丈夫，能屈能伸，今季放低身段加盟帕爾馬表現重生，並成為球隊精神領袖！呢位昔日「壞孩子」力爭重返意大利國家隊出戰世界盃，隊友們都會全力幫佢手，帕爾馬現時團結一致，上仗作客更擊敗勁旅拿玻里，今輪主場對博洛尼亞可望添食，要主勝。
博洛尼亞失波意甲第二多

31歲嘅卡斯辛奴今季已有5球進帳，包括上仗一箭定江山射死拿玻里，狀態大勇，意國傳媒及帕爾馬教練鄧納東尼都力撐佢入選國家隊。不過，卡斯辛奴首要工作係保持水準，說服意軍主帥柏蘭迪利落下重召命令，所以佢餘下每場都會搏命。博洛尼亞一向防守差，係意甲失波第二多球隊，今仗難擋卡斯辛奴進襲。
TVB 301直播