卡坦尼亞主場有計

猪拉多纳

ＡＣ縮皮變名牌陷阱

現今「金錢足球」主導下，稍欠財力都好難發圍，呢方面喺傳統大球會更明顯，意甲ＡＣ米蘭近年莫財，頻頻出售球星下已淪為中型班，今季成績不濟絕非偶然，而係反映咗球隊狀況。由於ＡＣ個「金漆招牌」夠響，仍受操盤手高估，今仗作客卡坦尼亞仲要讓半一，小心提防「名牌陷阱」。卡坦尼亞「小島威力」依然，受讓捧下盤。

（TVB 301周日晚7時30分直播）

ＡＣ米蘭上仗歐聯大炒些路迪，好大程度只為安慰球迷，以免未來賽事又畀憤怒fans包圍，呢種「被動式發奮」難以維持得耐。講到尾ＡＣ成績差，全因老闆貝魯斯干尼唔肯再揼水增兵，淨係諗縮數，想用二線人腳攞一線成績，絕對一廂情願。ＡＣ本身人腳唔足以應付意甲同歐聯兩條戰線，經過上周中惡戰後，好可能回唔到氣，今場仲要作客隨時會失分。

西西里島球隊卡坦尼亞依家排緊聯賽包尾，但主場仍有威力，今季六次喺自己地頭比賽，只輸過一場，絕對唔驚ＡＣ米蘭呢啲「偽名牌」，受讓值捧。
羅馬虛火已過咪再追

另一支意甲名牌羅馬虛火已過，不宜再亂追，作客讓唔起阿特蘭大半一。德甲方面，漢諾威仍然好沉，近八場未贏過，主場讓法蘭克福平半，揀下盤。英超重頭戲，熱刺主場對曼聯，雙方勢均力敵，入波能力高，建議要入球大。