巴塞立立亂畢爾包踩多腳

猪拉多纳

今晚西甲有好戲上演，畢爾包會喺主場迎戰「一哥」巴塞隆拿。畢爾包今季主場7戰5勝2和未輸過，今晚對住美斯受傷嘅巴塞，未必係大家預期中一面倒嘅賽事。賽前仲傳出美斯借離隊逼巴塞加薪嘅負面消息，今場一於撐讓球主客和嘅主勝！

（now632台周一凌晨4:00直播）
神秘球會2.6億年薪斟美斯

上周中巴塞喺缺少美斯下，歐聯作客竟然1:2輸畀阿積士，尋日西班牙《點球點》隨即爆出美斯獲神秘球會斟介，開出一份年薪達全球最高2,500萬歐元（約2.6億港元）嘅4年超級肥約利誘，目前只知呢個報價係由一部鄰近西班牙嘅電腦寄出，但報道講明開價球會「唔係皇馬或AC米蘭」。至於《阿斯報》就話美斯利用追求者逼巴塞加人工兼續約，打亂晒羅素爾同恩尼斯達、馬田蒙度亞等「配角」傾新約嘅計劃添。唔理單嘢係真係假，巴塞內部依家可謂立立亂。

畢爾包係支整體技術好好嘅球隊，入球分布極之平均，有4個球員入咗3球並列球隊首席射手，其中一個係後衞米基聖荷西，今晚對住防守死球經常有失誤嘅巴塞，隨時有斬獲。