曼城主場無敵劏天鵝

猪拉多纳

阿古路 尼格度着晒火

曼城今季主場打遍英超無敵手，強如曼聯、熱刺去到曼城球場都要輸鑊甘先准走，最恐怖係一對高矮箭頭阿古路同尼格度呢排着晒火，今晚對住隻「傷鋒天鵝」史雲斯隨時又大開殺戒，1.66倍「讓球主勝」趁熱食。

（now623台周一凌晨0:10直播）

可能好多球迷都覺得今季曼城好飄忽，有能力砌低勁旅，但又可以輸畀卡迪夫城、維拉同新特蘭。不過講到主場威力，呢支「億萬大軍」絕對唔係人咁品，佢哋今季英超主場6戰全勝勁入26球，就連一向唔算多產嘅尼格度近5場都有6球進帳，佢同阿古路目前已經合力包辦咗15個英超「士哥」，既然熱刺上星期去到曼城地頭都要吞夠6蛋，史雲斯又點會走得甩先？
史雲斯米捷 韋費特邦尼缺陣

據《曼徹斯特晚報》透露，曼城隊長高柏尼今仗未夠狀態落場，加埋拿斯達錫因為小腿受傷要抖3個禮拜，領隊比歷連尼今仗焗住要搵一對副選中堅尼史葛同迪米捷利斯鎮守後防。防線人腳係就係削啲，但亨格比利就覺得唔使太擔心，事關客軍史雲斯仲弊，首席射手韋菲特邦尼腿筋受傷要抖幾個禮拜，攻擊靈魂米捷又話足踝受傷唔出得，今仗要由仲未開齋嘅艾華路華斯基斯喺前線擔大旗，點睇都唔似會威脅到曼城後防，睇個勢呢隻「傷鋒天鵝」唔止會輸鑊勁，隨時連蛋都未必破到！