里昂出第3龍門 PSG乘勇開「讓主」

猪拉多纳

聽朝法甲將會上演新舊王者對決，由衞冕冠軍巴黎聖日耳門（PSG）主場恭候曾經打遍法甲無敵手嘅里昂。PSG藉射手伊巴謙莫域繼續有貨交，周中响歐聯打敗奧林比亞高斯，提早取得C組首名出線，今仗重返聯賽，對住有正副門將打柴嘅里昂，一眾鋒將仲唔把握機會入多兩粒攞威咩？1.86倍「讓球主勝」要追。

（TVB302周一凌晨4:00直播）
伊巴謙 卡雲尼連環發炮

取得跨季25場聯賽不敗嘅PSG，為咗拋離其他爭標對手，迎戰今非昔比嘅里昂肯定會乘勝追擊。淨係一個近9仗轟入15球嘅射手伊巴謙莫域，已經足夠搗亂連續5場作客都有失波嘅里昂防線。尤其是呢位瑞典國腳身邊仲有近幾仗連環發炮嘅卡雲尼、盧卡斯洛迪古斯、文尼斯等人幫手，連中場悍將馬度迪都話復出，強陣出擊下PSG想整多幾粒唔難。

至於喺01-02年至07-08年球季取得聯賽7連霸嘅里昂，今季演出令人失望，呢輪聯賽未開始前僅只得19分排第7位。而且呢班波目前傷兵唔少，中場拉治迪基素爾、穆罕默杜達保唔踢得，最麻煩係正副選門將安東尼盧比斯、哥基連同時受傷，要由維哥特頂上把關，睇怕今仗都係凶多吉少。