拜仁Run到順大炒格

猪拉多纳

德國盃16強今晚續演四仗，焦點戰奧格斯堡主場鬥拜仁慕尼黑，兩軍級數相去甚遠，拜仁無論質素同狀態都遠勝主隊，黑柴推介讓球客勝。

（無綫翡翠台周四凌晨3時30分直播）

基於上季三冠王成績太好，拜仁新帥哥迪奧拿對德國盃一樣重視，球隊近期喺傷兵滿營情況下依然強勢挺進，近個半月來三線作戰豪取9連勝，現時於德甲同歐聯都形勢大好，有足夠餘力兼顧德國盃，今仗即使續有舒韋恩史迪加、拿姆、比沙路同梳頓沙基利等傷兵仍然要抖，不過好消息係謝路美保定同列貝利都已傷愈復操，前者有望復任正選，後者亦可以重任後備，兵源方面更不成問題。
奧格斯堡注定捱打

奧格斯堡目前排德甲中游，成績已令會方同球迷相當滿意，呢班波勝在紀律好鬥志頑強，不過攻力不濟始終係致命傷，佢哋對弱旅時尚可憑突擊一拚，遇上中游球隊好多時連突擊都無力，好似上輪聯賽作客雖然悶和哈化柏林，但全場只得一次似樣射門，中場完全欠缺創造力，反擊速度亦欠奉，面對好似拜仁呢啲超級勁旅，就連穩守都做唔到。

兩軍不足一個月前已經喺聯賽交過手，奧格斯堡全場捱打毫無機會之餘，仲要淨吞3蛋，相信今晚情況都唔會有太大分別。

事實上，哥迪奧拿手上嘅拜仁已經搵到破密集良方，One touch互傳愈踢愈熟練，陣中多位技術精湛嘅中前場球員卻奧斯、堤亞高艾簡達拿同馬里奧葛斯都係「傳球大師」，經常可以憑致命直線撕破對手防線，就算對手頑強都頂唔住。

況且拜仁仲有巔峰狀態嘅洛賓，呢位荷蘭飛翼喺列貝利養傷期間全面爆發，過去一周3場賽事已為拜仁攻入4球，弗到勒唔住，隨時可以憑一己之力搞掂對手，相信拜仁今晚唔只贏一球。