慕遜加柏上盤咪走寶

猪拉多纳

史浩克扯乾要留力歐聯

德甲慕遜加柏主場對史浩克04，史浩克啱啱喺德國盃慘敗，近期防線曳得交關，加上要分心下周中對巴素利非勝不可嘅歐聯關鍵戰，今晚作客遇上主場無敵嘅慕遜加柏睇低一線，慕遜加柏讓平半，黑柴撐上盤。

史浩克近四場聯賽三勝一和睇落有啲起色，不過對手實力都唔強，球隊致命傷係後防不穩，至今十四場聯賽失咗二十六球認真失禮，球隊三線作戰疲於奔命，上周末聯賽贏咗史特加後，到周中德國盃主場面對殘陣嘅賀芬咸，贊斯基拿沿用贏史特加嘅所有十一個正選，結果因為踢得密出事，成班球員尤其防線輪流發夢，首先係基斯甸富治斯解圍漏踢，搞到同門將費文誤會首先失波，跟住內田篤人同鍾斯先後誤傳畀對手入波，連續三球波都係送大禮，真係睇見都眼冤！到咗下半場球隊全力反撲耗力多，但最終只能破蛋，輸1比3出局力疲心傷。史浩克下周中歐聯對巴素利非勝不可，今晚好可能畀嘅有疲態球員抖一抖。
近6主場5擒史軍

慕遜加柏今季德甲主場七戰全勝認真巴閉，上輪主場對弗賴堡基於輕敵同對手踢法主守，搞到陷於苦戰，下半場仲曾經飽食驚風散，最終小勝1比0，受過教訓後相信會打醒精神。今場情況亦唔同晒，面對名氣大嘅史浩克當然會提高警覺，加上客軍唔識守，更有利慕遜加柏打反擊，球隊近六次主場對史浩克贏咗五場，今晚有足夠信心延續主場全勝紀錄。
有線64及203台直播