水晶宮當頭起屠龍

猪拉多纳

呢兩日廣大球迷焦點都落喺世界盃分組賽抽籤上，此文見報時結果已經塵埃落定，依家講邊隊係真命天子仲係言之尚早，不過今屆決賽周可以講係近年最齊腳嘅一屆，大部分名牌球隊都有份參賽，可以預期到時投X額又有機會挑戰歷史新高。

言歸正傳講番今晚心水，英超水晶宮由前史篤城主帥佩尼斯接手後果然有起色，周中主場一球小勝韋斯咸取得換帥後首捷，呢班波人腳唔算強，但勝在有鬥心，正所謂寧捧當頭起，球隊換咗領隊後士氣好咗，今晚續喺主場面對另一支升班球隊卡迪夫城，平手盤非常抵玩。

「紅龍」卡迪夫城今季主場曾經贏過曼城同打和曼聯，不過作客就好似變咗另一隊波，對上三場客戰都冇波入，而且今季作客唯一勝仗只係靠補時入波先砌低走晒樣嘅富咸，要搶分有難度。

（now 625周六晚11時直播）
慕遜加柏主場無敵掃「克」

另外德甲心水，慕遜加柏主場鬥史浩克04，慕遜加柏今季主場七戰全勝，表現正氣，史浩克心繫下周中歐聯生死戰，主隊讓平半捧上盤。（有線64及203台周六晚10時30分直播）尾場就由兩支歐聯代表多蒙特及利華古遜正面對撼，由於受歐聯因素影響，呢場勝負難估，但兩軍同屬攻強守弱，預計會有唔少入波，捧大最啱數。

（有線61及64台周日凌晨1時30分直播）