波圖態沉分心醒布拉加

猪拉多纳

下周中係歐聯最後一輪分組賽，部分球隊面臨生死戰，今輪聯賽好可能留力，導致失分。葡超波圖最似會「出事」，皆因作客馬體會一戰，非勝不可，肯定將全副精神放晒喺呢場歐聯，聯賽擺埋一邊先。更何況波圖狀態低沉，已連續三場葡超失分，今仗主場讓唔起布拉加，阿King睇好開出讓球客勝。

（周日凌晨4時15分開賽）
連場失分問題多多

波圖近年頻頻出售主力搵銀，今季賣走埋摩天奴及占士洛迪古斯之後，球隊已被「陰乾」，唔夠實力兼顧葡超及歐聯，踏入十一月後成績每況愈下，近三場聯賽對比蘭倫斯、國民隊、科英布拉大學，竟然都贏唔到，上仗輸畀傳統魚腩「科大」最羞家。

以波圖嘅級數，連續三場失分畀弱隊，證明並非一時失手，而係球隊存在問題。加上歐聯生死戰當前，仲邊得閒理會聯賽，再次失分唔奇。
串西悉尼流浪者1860

至於布拉加今季成績的確退步，但近期演出已有改善，而且遇上勁旅波圖，球員都會特別落力踢爭氣波，可望全身而退，受讓抵玩。澳職方面，上季常規賽冠軍西悉尼流浪者經過連續兩場作客失分後，返回主場比賽，爭勝飢餓感更強，勢必攞包尾嘅墨爾本雄心祭旗，捧讓球主勝。德乙1860慕尼黑取得三連勝，全面回勇，主場出擊可望再下一城，擊敗柏林聯。