曼城喪攻做「大」騷

猪拉多纳

聖人後備龍門騰雞

上星期小妹讚完修咸頓條後防線穩陣，但唔知係咪讚得多讚壞咗，「聖人」已經連續3場聯賽輸波而回，喺積分榜由第3位跌到落第8位！相反，億萬大軍曼城近排氣勢非常凌厲，最近4場比賽全勝之餘，4場波合共入咗16球咁多，全部開晒大！今晚兩隊對決，梗係繼續捧1.75倍「入球大」啦！

正所謂輸開有條路，修咸頓已經連續3場聯賽輸波，痛失9分。所謂賠了夫人又折兵，輸波之餘仲連人都輸埋。作客車路士一仗連正選門將保路錫都受傷，證實手腕骨裂，需要休養6個星期。把守大門嘅責任就交咗比後備龍門加沙寧加，但睇佢喺場上嘅表現同保路錫比相差一大截，尤其判斷能力同位置感都冇保路錫咁好，今晚仲要對住近期氣勢如虹嘅曼城，一定又會失唔少波添！

客隊曼城近排戰績非常強勁，連贏3場穩坐聯賽榜第3位。雖然今晚佢哋要作客，但睇番佢哋上場聯賽作客西布朗，一開波已經反客為主啦，開波24分鐘已經入兩粒，領隊比歷連尼仲講明要喺明年1月殺上榜首，班球員收到柯打點會唔識做，今場肯定攻到修咸頓失晒魂。
藍月亮近4場入16球

曼城3名前鋒阿古路、迪斯高、尼格度同埋啱啱當選BBC非洲最佳球員嘅耶耶托尼，個個都有經驗，又有強勁入球能力！「藍月亮」近4場比賽合共入咗16球，平均每場有4球進帳，中場拿斯尼呢部「發電機」更加電力十足，隨時又交出多個助攻，今晚呢場「入球騷」一定唔可以錯過啦！