水手三箭鹿角「大」打出手

猪拉多纳

日職煞科3雄爭冠

日職終極爭霸日，３雄「大」打出手！今日係日職煞科日，當中川崎前鋒對橫濱水手、鹿島鹿角鬥廣島三箭兩場大戰，都同冠軍誰屬有莫大關係，呢啲唔輸得嘅波，大家都冇得保留，唔買入球大仲買得乜呀？
水手求W搵岡田武史打氣

先講川崎主場迎戰水手嗰場（有線62、202及148、now711台周六下午2:30直播），客軍水手一W就9年來再次稱霸日職，全隊上下自然咬牙切齒要贏。佢哋賽前唔單只搵嚟04年冠軍教頭，剛啱離開中超杭州綠城嘅岡田武史，同班球員訓話激勵士氣，仲喺贊助商日產汽車嘅總部搞直播大會，好顯然就係決心要贏呢場神奈川打吡，後衞中澤佑二更加嗌晒「絕對優勝（冠軍）」嘅口號添。

不過，川崎數字上依然可以爭亞冠盃資格，而且呢班波最近恢復喪攻本色，近10場只得兩場冇波入，已經有26球進帳嘅前鋒大久保嘉人，仲恥笑水手班後衞得個高字，鈍過鈍胎，好有信心數胡。既然係咁，呢場波又點解唔博1.65倍入球大呢？
廣島市長甘做阿二遭狂插

至於鹿島鹿角對廣島三箭都一樣，鹿島理論上冠軍未絕望，問題係佢哋嘅得失球輸晒，今場一定要豁出去狂炒廣島，先有一線爭冠生機，進攻意欲一定強。上季冠軍廣島亦都要贏至有望蟬聯，佢哋個市長松井一實本來想幫隊波減壓，公開講咗句「第二都幾好吖」，結果引嚟廣島三箭Fans狂插，市政府4日嚟收到超過250個電話同電郵，媽叉呢位「實」市長，逼到佢要公開道歉。由此可見，廣島孭住個非勝不可嘅包袱，實唔敢打穩陣波，寧願同鹿島死過，呢一場亦都適宜博1.68倍入球大。

（有線61、201周六下午2:30直播）