好戲早上演 多得靚抽籤

猪拉多纳

世界盃抽籤終於完成，賽前有唔少人彈劾賽制或抽籤唔公平，不過國際足協其實已經做咗好多公平同公正嘅措施。講真呢八組真係有辣有唔辣，可謂家家有求，但係Peter始終覺得，球隊實力、教練功夫同埋有冇主將到時受傷先係最重要。有唔少人都話今屆世界盃有四組死亡之組，其餘四組就好容易踢，不過Peter諗嘢就好positive，反而覺得頭三個賽日就有強隊互撼先至係好睇。
期待英意亞馬遜困獸鬥

首先係A組嘅巴西對克羅地亞，「南美森巴」火併「歐洲森巴」，剩係呢個牌頭都已經夠吸引。跟住就係B組嘅西班牙對荷蘭，呢場上年決賽翻版嘅戲碼，真係估唔到咁早就喺分組賽出現。最後當然係被喻為「Rumble In The Jungle」，喺亞馬遜進行困獸鬥嘅英格蘭對意大利。Peter認為意大利主帥柏蘭迪利講得非常啱，就係無論抽籤嘅結果係點，佢都好有信心球隊喺出年6月至7月會循序漸進漸入佳境，所以就算依家點抽都冇所謂，佢都會接受呢個安排。至於邊四組係死亡之組，邊四組係Easy之組，相信球迷自己亦心中有數。
金句：橫抽掂抽，都係要「抽」！