維拉平手盤致富

猪拉多纳

近5場聯賽不敗

英超護級分子富咸喺慘遭7連敗之後，聯賽榜依家只得10分喺手，跌咗入降班區域。荷蘭籍主帥祖爾亦都喺上星期被炒魷魚，暫時由助教梅倫史甸頂替帥位一職。今晚呢間倫敦球會喺主場迎戰近況唔差嘅阿士東維拉。足智彩開出平手盤，一於捧維拉！
富咸貝碧托夫嗌走

富咸近況相當差勁，連接輸畀熱刺、韋斯咸、史雲斯幾隊波，領隊祖爾又被炒，就連前鋒貝碧托夫都話有離心！呢位保加利亞名將喺上季由曼聯轉投富咸後，一直都係球隊嘅主力射手，喺44場英超攻入咗16球。但依家佢自爆喺富咸踢得唔開心，之前仲話好想喺1月轉會窗重開後跳船去其他英超球隊，聽到隊波最踢得嗰個都想走，班隊友又點會有心機搏呀？而且富咸今季聯賽喺主場出擊只係贏過1次，主場之利有等於冇，今晚好有機會「榮獲」8連敗！

另邊廂，客隊阿士東維拉喺周中作客擊敗修咸頓，近5場聯賽攞到2勝3和成績。上仗被收起射手嘅賓迪基，抖足精神後今晚隨時獲領隊林拔派上陣中止入球荒。就算唔出呢位比利時中鋒，佢哋仲有表現生猛嘅中場戴爾夫，上場就係佢帶領球隊打破修咸頓主場不敗之身，賽後領隊林拔都對佢表現讚不絕口。就算今晚作客出擊，相信維拉都可以輕易取勝。