紅魔當「克」好大鑊

猪拉多纳

Fans傷心自殺莫帥聽炒？

歐聯分組賽嚟到最後一輪，唔少組別都大局已定，A組大熱門曼聯已經提早出線，不過今晚對手係仲要搏命嘅薩克達，就算喺奧脫福踢，想贏波都唔係咁容易噃！尤其紅魔近排當黑，主場兩連敗，搞到有球迷傷心得滯自殺添。領隊莫耶斯咁大鑊，如果再打唔番起隊波，睇怕個帥位真係危危乎，今場當然要同薩克達死過，1.75倍入球大有計喎！

（有線64、203周三凌晨3:45直播）
奧脫福連敗今場唔衰得

其實曼聯今場只要唔輸波，就可以保住分組首名晉級16強，本來應該係輕鬆上陣，可惜紅魔近期戰績差勁，先係主場輸畀愛華頓，上場仲要打破埋41年來從未喺奧脫福輸畀紐卡素嘅紀錄，仲有肯尼亞球迷傷心過度走去自殺（見右文），唔少曼聯躉都話要莫耶斯下台。依家每場波對莫帥都非常重要，尤其曼聯向來好重視歐聯成績，如果連對薩克達都輸埋，相信管理層對佢嘅信心會進一步下跌。
薩克達爭出線非勝不可

事實上紅魔鬼牌面仍然係好勁，尹佩斯傷愈復出將同朗尼合作攻堅，火力夠晒保證；日本國腳香川真司今季踢歐聯又例有好表現，有佢幫呢兩位頂級前鋒鋪橋搭路，入波自然唔會少。今場仲要喺無出線壓力下比賽，應該可以踢出更高水準。

對手薩克達今場雖然作客亦冇得縮，事關佢哋依家只領先排第3嘅利華古遜1分，而利華今場只係對住已經出局嘅皇家蘇斯達，如果呢場真係畀利華全取3分，薩克達今場就更加非勝不可！好在薩克達有阿歷士泰斯拿同雷斯阿祖安奴等高質素巴西攻擊球員，要入曼聯波都唔難呀！
Data King曼聯奧脫福戰歐聯例入波

‧曼聯過往鬥烏克蘭球會未輸過，5戰錄得3勝2和。

‧曼聯近14場坐鎮奧脫福出戰歐聯，只有1場冇波入。

‧朗尼為歐聯史上入球最多嘅英格蘭球員，射入29球。
乜都玩錦囊 紅魔小讓平半博得過

曼聯雖然喺英超表現麻麻，不過嚟到歐聯就唔同講法，分組賽5戰3勝2和冇輸過之餘，過往5次火併烏克蘭球隊亦錄得3勝2和不敗成績，今場小讓平半有不俗分頭，博得過！
頂占筍盤：曼聯（入球大）