賓菲加PSG鬥攻演入球騷

猪拉多纳

歐聯分組賽嚟到最後一輪，今晚C組有肯定首名出線嘅巴黎聖日耳門，作客力爭次名出線嘅賓菲加，呢支識攻唔識守嘅葡超球隊肯定由第1分鐘開始就力爭士哥，同火力超強嘅PSG玩鬥攻，梗係直取1.85倍入球大啦！

（開賽時間：周三凌晨3:45）
賓菲加猛火一定搏

賓菲加目前同小組次席嘅奧林比亞高斯同樣得7分，可惜對賽成績同球差都較為輸蝕，想爭取出線嘅話，先要望對標準列治嘅奧軍失分，當然自己都要做好本分全取3分啦！賓菲加喺歐聯入波唔算多，但家陣喺葡超同波圖並列為火力次強嘅球隊，近5場有3場都入到3粒，陣中除咗洛迪高摩連奴連續3場有士哥，洛迪高利馬亦都喺兩場勁入3粒，對住只抱住「例行公事」心態，兼有馬高華拉堤同雲達韋爾停賽嘅PSG，隨時咬得入對手o架！

巴黎聖日耳門肯定以首名晉級，今場當然唔會強陣應戰，教頭白蘭斯講明會畀伊巴謙莫域抖抖，不過拿維斯同卡雲尼是但出一個，再搭住文尼斯呢啲後備殺手，都已經足夠射穿近6場得1戰冇失波嘅賓菲加大門，要玩鬥攻，真係未驚過囉！