弗賴堡輕歐重德

猪拉多纳

入球吼細最值得

隨着今晚歐霸盃分組賽完成，晉級歐聯和歐霸淘汰賽的球隊將會全部誕生，而下周一傍晚六點四十五分，有線足球台將會直播淘汰賽階段的抽籤儀式，究竟有哪幾對冤家需提前互撼？身為德甲球迷，本人今日在此想談的歐霸直播場次，自然是H組賽事弗賴堡主場對西維爾。

弗賴堡上屆表現超「弗」，是名副其實的「弗」賴堡，他們最後更爆大冷成為德甲第五名，都算相當巴閉！可惜好景不常，球隊今屆陣容慘被「拆骨」，現時聯賽排名已跌落至尾三，即使還有半季未踢，但球會高層心中有數，已經開始要為護級做好準備。

本人極欣賞弗賴堡教練施特拉希，他當然亦明白當前首要任務是「避免降班」，所以除了於歐霸分組賽首仗時派「夫添」上陣外，打從第二輪開始，他已經被迫要「輕歐重德」，以主力副選各執一半去應付歐霸，落場球員即使並非Hea住踢，但比賽態度的確稍稍不及在聯賽積極。結果係點？球隊最近四場歐霸合共只錄得30次射門，即平均每場只得可憐的7.5次攻門，入球亦只得3個！
西維爾篤定出線無謂搏

無巧不成話，弗賴堡和西維爾於今屆歐霸同樣起用過廿二人充當正選，輪換味道重得交關，相信今晚兩隊正選陣容都十分難估，除了使我這個「夢幻領隊」遊戲的忠實玩家極度頭痕之外，今仗勝負亦不容易預測。不過以弗賴堡近幾仗歐霸盃的用人方針、臨場發揮和比賽態度，加上西維爾因為已經篤定出線而無必要搏到盡，我估計今仗入球應不多！

（有線61及201台周五凌晨4時05分直播）