多蒙特殘陣好難搶「芬」

猪拉多纳

近期愈戰愈勇嘅賀芬咸，今晚會喺主場迎戰啱啱喺歐聯晉級嘅多蒙特。賀芬咸依家踢出今季暫時最強嘅氣勢，相反「蜜蜂兵團」連場大戰、條防線更加捱到散散地，疲兵作客，根本讓唔起賀芬咸，小弟撐2.02倍「讓球主勝」！

（有線64及203周六晚10:30直播）
賀芬咸近3戰喪轟9粒

賀芬咸最近3場賽事有2勝1和，包括喺德國盃作客淘汰史浩克04，成班波明顯打咗支強心針！事實上，賀芬咸最近鋒力大爆發，攻擊球員禾蘭、羅拔圖法明奴、莫迪斯迪同沙利荷域呢四位好波之人，狀態弗到冇朋友，協助賀芬咸喺最近呢3場波喪入9球！查實賀芬咸班底唔曳，只要打番起個信心，呢班波真係絕對唔可以睇小。
蜜蜂成條防線打晒柴

上屆歐聯亞軍多蒙特，之前一直為歐戰出線而搏老命，搞到近4場聯賽輸足3場。周中幾經辛苦，多蒙特先擊敗馬賽殺入16強，但佢哋付出嘅精神同體力肯定唔少。幾個受傷嘅防線大將蘇保迪、曉姆斯同舒姆沙仲抖緊，就連希臘中堅柏柏斯達夫普路斯今晚都要坐波監，人家賀芬咸仲唔趁機谷行道火喪攻咩？「蜜蜂」防守唔掂之餘，仲學人作客讓波？唔反真係對唔住自己囉！
頂占筍盤：賀芬咸（讓球主勝）