勁酒王分量十足

猪拉多纳

　　今日8場草地用C+3欄，落埋雨，睇怕後上馬都冇運行。泥地又唔知利放利追？想先睇一場，但全日得兩場，又隔得比較遠，有冇參考價值呢？兩睇啦。好心安排泥地賽就咪得兩場咁孤寒，有關方面呢樣，真係多年都唔識轉膊。

　　第三場三班1000米草地。「勁酒王」十月發過燒，之後操練停一排，近呢個幾月已經操到火紅火綠，睇準備手法，老蔡有心搏今場。賽前莫雷拉試過，最後竟然益馬偉昌，有冇咁好恩惠？！我阿棟唔敢一口咬定，唔好理係人推莊，定係練馬師主意，我淨係知道兩樣，隻馬在三班超超，同埋，用阿昌隔晚獨贏都係得4倍，極之重飛。

　　第六場四班1400米草地。「智者」一出即贏，爆出接近廿倍冷W，高伯新向來喜歡熱食，呢類冷馬好少，唔知係咪爆，唔排除有咁可能，無論點都好，睇好佢，係因為佢上場贏對手唔係差，都係最近跑得好如「無敵王者」及「龍華太旨」，估計加分後留在第四班仲係有得爭。

　　第九場二班1650米泥地。「摩法神采」季初第1鋪跑1400米輸得好遠，之後連場跑泥地，一一上名，1200米路短咩，一樣得，前仗一哩仲要贏埋。

　　摩法神采睇高一線

　　其實，「摩法神采」之前已經連續兩場得WQ，跑到上場仍然入圍，我有少少意料不及，因為賽績夠響夠獎啦，歇一歇，人之常情，既然阿摩唔畀佢停，今次轉戰一哩，梗係要睇高一線。陳華棟資深評馬人