億萬「大」戰 熱刺反彈撼利記

猪拉多纳

新兵上力場場省2粒

今晚英超矚目大戰，梗係要數熱刺主場惡鬥利物浦。主隊經過開季一段低潮期後，一班億萬新收購似乎終於上力，取得近5戰不敗兼場場入2粒。不過近2場喪入9球、有蘇亞雷斯踢到着晒火嘅利物浦一樣唔好惹，咁啱兩軍都係攻強守弱，硬碰之下實開入球騷，一於捧1.72倍入球大啦！

（now621台周一凌晨0:00直播）

利物浦近期係威係勢，最近5場賽事除咗作客意外以1:3輸畀侯城之外，其餘4場都至少入3粒，一共攻入17球，前鋒蘇亞雷斯仲包辦咗9球添！「哨牙蘇」狀態咁弗，同好拍檔菲臘比古天奴近期復出不無關係，相信就算史杜列治要休戰一段時間，短期內亦唔會對紅軍火力有太大影響。
利物浦5戰勁入17球

雖然話利物浦由2008年起就未試過作客白鹿徑球場贏波，但家陣佢哋最驚嘅加里夫巴利已經走人，之後聖誕快車嘅賽程又咁難打，周中冇歐洲賽事以逸待勞嘅紅軍肯定搏甩髀啦！
熱刺「蘇大盜」復活

不過主隊熱刺近排亦都非常好火，連續5場至少入兩粒，今夏王牌收購蘇爾達杜更喺上仗歐霸盃鬥安治嗰陣大演帽子戲法，西甲時代嘅「蘇大盜」似乎終於返嚟，有力同利記嘅「蘇神」鬥數胡，對住近13戰得1場冇失波嘅紅軍，想取得士哥絕對唔難。弊就弊在熱刺近8場只得1次保住清白之身，防線隨時畀「哨牙蘇」搞掂，不過咁就啱晒鍾意睇入球騷嘅球迷啦！
Data King 利記作客例失波

熱刺近6次主場鬥利物浦獲全勝，全部開入球大。

利物浦近7場作客賽事僅得1勝，當中只得1場冇失波。

熱刺近6戰主場曾2次輸波。
乜都玩錦囊 紅軍海鮮波平手捧熱刺

雖然利物浦今季表現明顯好過上季，但係海鮮味仍然非常濃郁，今季作客更只贏過2場，加埋謝拉特同佐敦軒達臣兩名中場大將齊齊缺陣，蘇亞雷斯靠一己之力都未必救得到隊波，對住近況唔錯嘅「剋星」熱刺贏面唔高，平手盤嘅1.81倍主勝諗得過。