巴塞「半場大」開殺戒

猪拉多纳

丙組仔卡達真拿送上門練靶

西班牙盃周三凌晨上演部分第四圈次回合賽事，其中巴塞隆拿將回師主場撲擊低組別球隊卡達真拿。巴塞今季只曾一次於主場贏唔到波，其餘所有賽事皆錄得全勝，即使出副選亦有力大勝卡達真拿，主W只得1.02倍冇肉食，鑑於首回合上半場已出現三個入球，卡達真拿於有氣有力下或能於巴塞身上取得入球，今仗一於捧1.54倍半場大。

（now 632周三清晨5時直播）

巴塞隆拿上仗作客卡達真拿，初段表現其實未如理想，更被對手率先取得入球，一眾球員其後才如夢初醒連環取得入球獲勝，搞到球迷虛驚一場。
柏度擔大旗都夠砌

如今巴塞回師主場出擊，睇番往績，佢哋喺魯營作賽唯一一場和波就係季初西超盃同馬德里體育會互交白卷，其餘11場全勝，故今仗相信仍會收起尼馬、恩尼斯達及沙維等主力，但上仗梅開二度的柏度洛迪古斯於聯賽對維拉利爾只以後備上陣，估計會繼續擔大旗，配合其他攻擊主力如阿歷斯山齊士及法比加斯等，要在卡達真拿身上取得入球實在沒有難度。

卡達真拿雖然只屬西丙四球隊，但上仗面對巴塞表現毫無懼色，更率先打開紀錄。卡達真拿今仗作客魯營球場實屬凶多吉少，但球隊放開心情來踢或有意想不到效果，加上巴塞後防近期表現不算太穩陣，卡達真拿於上半場有氣有力下隨時可於巴塞身上取得入球，阿謙決定捧半場大。