呂健威今季谷戰「勁」

猪拉多纳

　　呂健威今季認真巴閉，目前累積17場頭馬，排名練馬師榜第三位，亦都係一眾華籍馬房名次最高，之前亦講過，今季呢個倉勝在子彈多，唔使擔心搏搏冇貨交。

　　今次谷戰，可謂開正佢瓣，從前谷草贏馬最多馬房，唔係阿方，就數到葉楚航，今季情況有新景象，呂以11場暫時領先，隨後係各有8W蔡東徐三。亦即係話呢個倉有超過6成頭馬係來自谷草，再睇埋今期佢手馬，唔會唔落。

　　上海先鋒無保留

　　呂今次派馬5匹，「迎風起舞」及「精算率然」冇場跑得特別吸引，無謂錢。其餘3件就唔同，先講第一場「上海先鋒」，前華寶藏，贏完，姿態大超班，雖然呢次跑短200米，中年馬用得就用，唔會有所保留，值得信多一次。

　　第四場「共創良機」上場分明發揮唔夠好，楊明綸舞唔掂，輸在太早發力，今次拿拿聲擺潘頓上去，為乜？梗係想贏馬交代啦；第七場「勁飛揚」，兩個禮拜前，在騎師錦標賽贏到離行離列，以前班底厚，上番三班唔使怕，如果呂健威今晚連環出擊，呢匹馬會係必然重心。

　　Jack