小倫敦打吡普細歡騰

猪拉多纳

熱刺士氣頹爆 錘仔掛住護級

仲有一星期就到聖誕，倫敦市面早已充燈飾璀燦，充滿佳節氣氛，但今晚喺英聯盃8強交鋒嘅兩支倫敦球會近況就認真唔開心，主場嘅熱刺被利物浦狂數後怒炒領隊保亞斯，令成班頹兵更加失晒方向，主場出擊優勢全無；對手「錘仔」韋斯咸家陣喺聯賽排緊17位，護級緊要過爭盃仔，既然兩軍戰意模糊，下周又要應付聖誕快車，估計呢場「小倫敦打吡」雙方會逗住嚟踢，捧入球細，贏番啲迎佳節。

(TVB 302周四凌晨3時45分直播)
舒活頂檔難有作為

熱刺日前喺主場畀利物浦大炒0比5，創出16年嚟主場最大敗辱，領隊保亞斯（AVB）終難逃被炒一劫，AVB一套行唔通，「熱粉」均希望球會高層嘅Plan B（B計劃）會好過Plan AVB，但其實佢哋根本未有Plan B，仍未正式搵到合適人選做主帥，只係搵咗前熱刺中場舒活擔任看守教練，暫時頂住檔。

雖然舒活喺08年就加入熱刺成為教練團其中一員，但實際上佢係冇任何執教經驗，球員既未熟悉佢嘅戰術踢法，上場被大炒後，球隊狀態、士氣更係跌到最低點，舒活難喺短時間內執返好隊波同提升球隊士氣，今場入波唔會多，再加上熱刺今季曾喺主場大敗韋斯咸0比3，吸取咗上次教訓，今次再遇仇家自然不敢輕舉妄動，會踢得更穩陣。
大Sam亦聞魷魚香

成個月前韋斯咸領隊「大Sam」艾拿戴斯同樣已經聞到魷魚香，只係估唔到AVB畀佢行快一步，前車可鑑，「大Sam」深知依家排喺聯賽榜尾4嘅韋斯咸首要目標係護級，而非爭呢隻盃仔，否則會同AVB落得同一下場，而且下場聯賽對手係強敵曼聯，「大Sam」今場更會為留力而出多啲副選，喺大家都缺乏爭勝決心嘅形勢下，細盤捧得過。