水手節慶捉鳳凰

猪拉多纳

轉場踢聲勢更壯

上季澳職總冠軍中岸水手轉場吸客，今日移師北悉尼橢圓體育場迎戰威靈頓鳳凰。唔好以為水手失去主場之利，其實球隊喺當地擁有超過6萬支持者，難得水手大駕光臨，令當地fans歡喜若狂，勢必爭相入場打氣壯聲威。何況對手係今季仲未開齋嘅鳳凰，水手正好趁機贏場漂亮勝仗，省番靚招牌，直取主勝。

（有線64及203台周四下午4時30分直播）

今仗屬於「水手足球節」嘅一部分，球隊特別安排喺距離大本營哥斯福以南嘅北悉尼橢圓體育場比賽，原來有超過6萬位哥斯福居民喺北悉尼工作，平日趕唔切返去睇水手主場賽事。適逢「足球節」，水手今仗索性轉場方便fans入場打氣，屆時主場氣氛肯定更加濃厚。
鳳凰聯賽未開齋

值得一提，水手教練菲摩斯球員時代効力嘅球隊「北方精神」，主場正係北悉尼橢圓體育場，佢話估唔到會以教練身份「返屋企」，今仗必定做齣好戲報答江東父老，一掃上仗慘敗畀阿德萊德聯0比4嘅頹勢。客軍威靈頓鳳凰衰到貼地，今季聯賽九戰仍未嘗一勝，而且近八次對水手輸足七次，完全被對方剋死，更何況球隊狀態處於低谷，今仗凶多吉少。