奧堡弗爆強挑法福

猪拉多纳

專注聯賽硬淨到暈

德甲獨腳戲法蘭克福主場鬥奧格斯堡，睇雙方牌面人腳，主隊似乎稍勝一籌，不過踢咗半季，成績就同實力不成正比，法蘭克福乜波都搏，三線作戰搞到筋疲力歇水準反覆，相反專注德甲兼鬥志十足嘅奧格斯堡愈戰愈勇，黑柴認為法蘭克福主場都讓唔起，奧格斯堡受讓平半值得捧場。

（有線61及201台周六凌晨3時30分直播）

法蘭克福兵源唔算充裕，今季三線作戰場場搏，雖然能夠喺德國盃殺入八強，更成為唯一喺歐霸盃小組出線嘅德甲球隊，但代價係無力兼顧聯賽，目前排喺尾四位置要護級，今季喺德甲主場仲未開齋，雖然上仗作客爆大冷贏咗聯賽二哥利華古遜，不過嗰場波對手演出嚴重失準，而為法蘭克福奠定勝局嘅馬高盧斯又喺比賽末段傷出，今晚無緣披甲，面對超硬淨嘅奧格斯堡，想喺聯賽主場開齋唔係咁易。
11月至今只輸過畀拜仁

奧格斯堡就好自量，一於專注聯賽，教頭韋恩薛亞強調防守同紀律，踢落相當硬淨，近期仲連中前場都着晒火，老大哥哈利艾天托普同90後當起中場安達夏恩都弗到爆燈，球隊現時有前有後，踏入11月至今踢咗7場波，成績係4勝1和2負，所輸嘅兩場波分別係德甲同德國盃，對手同樣係踢緊世冠盃嘅超級班霸拜仁，呢兩場波加埋都只係失5球，其餘5戰攞到4勝1和佳績，足見佢哋幾咁硬淨。事實上，奧格斯堡目前攞到23分排聯賽榜第8位，成績遠超預期，亦係球會史上喺德甲前半季得分最多新紀錄，今晚強勢作客信心十足，相信唔會空手而回。