獅吼捉噴射機祭旗

猪拉多纳

主場同Fans開「百勝P」

仲爭1場，布里斯班獅吼就可以創造歷史！今日晏晝嘅澳職獨腳戲，布里斯班獅吼會喺主場迎戰紐卡素噴射機，只要獅吼贏波就可以成為澳職史上首支100W球隊，全隊上下已經準備喺自己地頭同班Fans開Party，為報上月一敗之仇實搵噴射機祭旗，捧主W。

（有線64及203周五下午5:00直播）

查實唔係傳媒單聲，獅吼教練梅維都唔知自己隊波已經贏咗99場澳職，佢老人家賽前話呢項「百勝紀錄」係屬於球會上下每位職球員，仲話唔想令主場球迷失望，希望可以同班Fans齊齊見證獅吼創造歷史，橫睇掂睇今仗都唔衰得喎！
獅吼4連勝講明復仇

雖然上個月噴射機喺主場以2:1砌低獅吼，但嗰場波傾盆大雨加上獅吼後防連環「送大禮」先會反敗，成班手足賽前已經講明要復仇。況且輸完嗰場波之後，獅吼已經連贏4場，狀態好到不得了。

作客嘅噴射機賽前收到個好消息，就係主力射手尼敦般斯已經復操，今仗可以候命，但咪忘記噴射機後防主要由奇治葛雲同史葛尼維利幾位後生仔孭飛，經驗不足係球隊連續7場有失波嘅主因，撞正近4仗勁入4球嘅獅吼當旺射手貝利沙，唔慌有運行啦！