不來梅不設防明醒利華

猪拉多纳

德甲雲達不來梅主場鬥利華古遜，雲達不來梅今季明顯搵錯人教，失敗教頭杜特愈教愈差，球隊狀態陷於谷底，防線更愈嚟愈差，今晚面對志切反彈嘅勁旅利華古遜唔夠砌，利華古遜讓半一宜捧上盤。
教練杜特冇腰骨

不來梅近5場聯賽只得1分，目前排尾4受到降班威脅，自主力中堅普特爾受傷後，杜特重用剛果守將穆迪高薩扼守中路，結果喺普特爾缺陣嘅近7場聯賽狂失25球，另外杜特又將失利責任歸咎於門將美亞列斯，近3場聯賽將佢雪藏，但頂替佢嘅拉菲爾禾夫踢咗3場勁失14球，簡直慘不忍睹。球隊近期士氣低落內部問題多，隊長富斯較早前操練仲同18歲年輕前鋒些魯奇大打出手。當被問及戰績欠佳時，杜特竟然話：「球會唔夠資金畀我增兵，又點可以要求過高？」喺一個咁冇腰骨嘅主帥帶領下，不來梅前景悲觀。今仗主力中場肯特同射手尼斯彼德臣都受到傷患困擾，前者肯定缺陣，後者亦上陣成疑，令不來梅弱上加弱。

利華古遜上仗主場突然失準，輸畀法蘭克福被破主場不敗身，現時已經落後榜首拜仁7分，想保持爭霸希望已不容有失，好在呢班波慣性輸完之後必振作，今季佢哋輸過5場波，頭4次輸完之後，有3次大炒對手洩憤，另一場歐聯作客薩克達亦和波而回，今晚面對不設防嘅雲達不來梅睇嚟又可以強勢反彈。

有線64台及203直播