不來梅內訌頂唔住利華

猪拉多纳

踢波同做人一樣，遇到低潮唔緊要，最重要係識企番起身。不過德甲球隊雲達不來梅就認真濕滯，近3個月來只係贏過一場波已經夠頹，前排班球員仲喺練波嗰陣內訌打大交，睇嚟真係無乜運行。佢哋今晚主場迎戰勁旅利華古遜，小弟就睇好1.68倍客勝喇，皆因依家排第2嘅利華，梗係想趁拜仁慕尼黑去咗踢世冠盃，乘機搶分拉近同榜首嘅差距啦！

（有線64及203周六晚10:30直播）
老大哥富斯練波同新丁開拖

雲達不來梅今季成績勁唔掂，自從9月21號贏過漢堡之後，一直無聲無氣，咁耐淨係贏過漢諾威咁大把，就算喺主場都被打到落花流水，對上一次主場就慘被拜仁K.O.狂數7蛋，可見不來梅對住頂尖球隊係毫無還擊之力。最衰連班球員都唔爭氣，老大哥富斯日前練波時竟然同個新丁開拖，而且仲畀記者影咗登埋出嚟！家醜曝光梗係嚴重打擊士氣啦，想反彈無咁易囉！

作客嘅利華古遜實力強橫，雖然上星期意外輸畀法蘭克福，不過嗰場佢哋啱啱踢完歐聯體力未恢復，但今場出征不來梅前已經抖足成個禮拜，有望發揮最強戰鬥力。南韓射手孫弘民近期狀態大勇，佢同傑斯寧嘅攻擊組合亦愈來愈有火花，要撕破不來梅個紙屏風防線真係易如反掌，就算中堅史柏希斯要停賽都冇有怕啦！
頂占筍盤：利華古遜（客勝）