皇馬蓄銳橫掃蝙蝠洞

猪拉多纳

C朗提早聖誕獻禮

2013年西甲最後一戰上演壓軸好戲，由華倫西亞主場火併皇家馬德里守尾門。雖然華倫炒咗教頭杜傑後，成隊士氣好番啲，但實力始終差成條街，加上近年皇馬喺聯賽作客「蝙蝠洞」勁旺，喺射手C朗養精蓄銳下，可盡情蹂躪「蝙蝠兵團」，提早送份聖誕禮物畀大家，直取讓球客勝。

（now 632周一凌晨4時直播）

貴為02及04年聯賽盟主，華倫西亞因財困被迫年年賣人，韋拿、大衞施華、桑馬達等球星統統走晒，上季連歐聯入場券都不保，已經走晒下坡。今季華倫邀請球隊名宿杜傑執教，有傳眾將唔妥杜帥，夾計做衰成績想整走佢，依家「蝙蝠兵團」跌到落第9位，終於求仁得仁炒咗杜帥，仲即刻反彈，上周中西盃小勝塔拉戈納晉級，不過佢哋未搵到新帥，拍埋超晒班嘅皇馬差天共地。
近四次作客華倫全勝

皇馬球星如雲就唔使多講，最重要係主帥安察洛堤識玩輪換，上周中西盃輕取奧林比薩維亞，大軍名單冇王牌C朗、加里夫巴利、莫迪歷等主力，就算前鋒賓施馬都係後備入替輕舒步頭，話晒打埋呢場就放聖誕，加上上仗聯賽作客奧沙辛拿大意失分，點都會搏盡贏得好好睇睇向粉絲交代。

睇番皇馬近四次聯賽作客「蝙蝠洞」全勝，當中不乏6比3、5比0等大手交易，雖有中堅比比坐波監，好彩其拍檔沙治奧拉莫斯上訴成功唔使停賽，陣容較完整之下，要大炒今非昔比嘅「蝙蝠兵團」冇難度，讓球客勝有逾2倍咁筍，真係有買趁早。