士哥王國米Vs全攻型AC 打呲入波Show

猪拉多纳

褪色打吡，激鬥依然！意甲米蘭雙雄今季齊齊冇貨交，踢咗接近半季竟然雙雙不入前4。不過，以為依家嘅米蘭打吡係悶波一場就錯晒喇，事關國際米蘭係今季意甲入球王，平均每仗入2.25球，為爭歐聯資格唔會留手。至於以「腦殘」巴洛迪利為首嘅「全攻型」AC米蘭，勝在個個識入波，為抗死敵一樣打甩髀。今晚呢場入球大戰，力奇捧1.8倍入球大！（TVB301台周一凌晨3:45直播）
國米入波數字冠意甲

冇錯，意甲今季爭標已經成為祖雲達斯鬥羅馬嘅局面，「藍黑兵」家陣16戰得28分排第5，落後「一哥」祖記15分；「紅黑兵」仲衰，得19分排第10，似乎已經將注意力轉去歐聯爭霸之上。只係講到底，米蘭雙雄係經典宿敵，每次埋牙唔會留手，至少AC肯定唔想眼白白睇住國米下季有得踢歐戰但自己冇份，今鋪梗係搏盡攬住一齊衰。

賽前國米收到好消息，佢哋對意大利足總判罰關閉北看台嘅上訴得直，今仗肯定好氣氛，為咗報答球迷支持，佢哋一條表現神勇嘅鋒線必定格外落力。事實上，「藍黑兵」今季16場入36球嘅火力係意甲最勁，陣內最具把握力射手係阿根廷尖刀柏拉斯奧，今季已經入咗9球，加上拍檔莫路伊卡迪終於擺脫傷患可以擔正，今勻撞正位列意甲倒數第5差嘅AC防線，自然係開餐好時機！
AC「12士哥拿」人數第2多

AC班主貝魯斯干尼周中表示會淡出政壇，專心球會事務，大軍士氣當然提升。雖然佢哋今季前線表現飄忽，首席射手巴洛迪利都只係入得6球，但查實佢近3場聯賽交出咗3個士哥同1次助攻，近況唔錯o架！況且AC全隊今季已經有12個球員喺聯賽開齋，全意甲就只得羅馬有13個「士哥拿」叻過佢哋，「紅黑兵」個個都有本事搵食，趁住國米防線主力森美爾缺陣，自然有力合演一場入球騷啦！
Data King AC後勁冠意甲

‧AC米蘭今季最後15分鐘共入9球，冠絕意甲。

‧AC今季聯賽入波共由12個球員取得，為意甲第2多。

‧國米聯賽16戰入36球，意甲排第1。
乜都玩錦囊 國米掛名主場有優勢抵捧

除咗玩入球大之外，今場讓球開平手，國米「主勝」應該坐走望贏，始終藍黑兵團今季專心聯賽，表現較AC穩定，加上佢哋喺近8次掛名主場嘅米蘭打吡贏出6次，信數據都捧得過o架！