莫連奴揸車專爆廠

猪拉多纳

相生相剋 不可不信邪

世間萬物相生相剋，阿仙奴教頭雲格命中注定畀車路士主帥莫連奴剋死，無論點樣花盡心思部署，最終總會同勝利擦身而過。莫帥過去九次帶領車仔鬥「兵工廠」唔識寫個輸字（見附表），今次領軍作客阿仙奴又係搶分時候，受讓必捧讓球客勝！

（now 621周二凌晨4時直播）

今季英超領隊人來人往，阿仙奴教頭雲格勁敵費格遜收山告別曼聯，佢滿以為少個對手，點知輪到另一仇家莫連奴回歸，雲帥近年對住老費輸多贏少，但佢更怕莫連奴，畀寸王恰到上心口。莫帥第一次帶車仔八戰阿仙奴取得四勝四和，包括於07年聯賽盃決賽砌低對手捧盃。「兵工廠」今季踢到曉飛，但於聯賽盃主場對車路士都淨吞兩蛋，不可不信邪！
聯賽盃出局更肉緊

車路士近況唔算突出，上場聯賽盃作客新特蘭踢足百二分鐘反輸一比二，激到莫連奴紮紮跳，佢上周中勒令將士取消聖誕派對，專心備戰今場關鍵「六分波」。莫帥一再高調批評隊內前鋒把握力曳，搞到球隊成日贏形勢輸波，不過，轉會窗一日未開，佢都焗住喺三大前鋒費蘭度托利斯、伊度奧同丹巴巴亞揀個頂住先，經過盃賽意外畢業後，相信班兵會更肉緊。
阿仙奴防線有隱憂

阿仙奴上周聯賽作客曼城被大炒六比三，有如被當頭棒喝，對班波未嘗唔係好事。之不過「兵工廠」防線確實存在隱憂，今戰中堅高斯尼有傷未必出得，或要起用久疏戰陣嘅華美倫，隨時成為計時炸彈。雲格死撐班波冇跌watt，傷愈復出冇耐嘅禾確特都幾弗，但進攻重心奧斯爾經過近半季拚搏後明顯冇之前咁醒神，今次鬥車仔冇乜優勢，讓波信唔過。　　
領隊 Chit Chat

雲格（阿仙奴領隊）：呢場波唔係我同莫連奴個人對決，我哋以往喺唔少大戰交過手，但呢一刻最重要係阿仙奴重返勝軌，繼續打好波！

莫連奴（車路士領隊）：奧斯爾係個現象級球員，我會諗計睇實佢。阿仙奴擁有強大陣容，有埋奧斯爾好鬼勁，今季絕對係爭標要角。