晨采潘頓當寶

猪拉多纳

莫雷拉又被罰停賽，即聽到其他人陰謀論咁講，話馬會咁做，係想幫潘頓或韋達做冠軍，真相是否如此，見仁見智，但雷神停賽，兩位大哥今次即刻多番啲實力坐騎，其中潘頓更加騎足八場。單計滿額，蔡明紹同楊明綸都係，但睇番潘頓手馬的操練及實力，好明顯係揀過度過，谷草主場出戰，隨時又可像上季聖誕賽期般，連場報捷。
       
潘頓

第三場四班1650米，「競駿才子」、「晨采」、「好旺財」三駒上仗騎師都係潘頓，排位公布「晨采」配潘頓，第一個諗法當然係揀騎，不過我問過記者，原來潘頓一早應承咗呂健威，所以今場一定要騎「晨采」上陣，雖然唔係大家所諗咁揀騎，但近七課快跳六度主試，從晨課操練之中，已經可以睇得出潘頓對「晨采」幾咁重視。上次評47分歷季新低，已造23秒正末段時間後上跑第二，今次同場快馬甚多，形勢仲啱追。
       

第四場四班1650米，「過關勇將」長期配王志偉及吳嘉晉等騎師，乃一貫葉廐減分手法，季內四戰順序名次10、5、4、2，愈跑愈近，狀態在賽事中不斷提升，一到位就即刻擺個潘頓上去，好多馬迷就係鍾意葉楚航明刀明槍。