豁達瀟灑主項出擊

猪拉多纳

　　今賽開始回復恬靜，因為莫雷拉再次被罰停賽。佢係就係好武功，陣上頭腦冷靜，鞍上姿勢時柔時烈，可配對唔同馬，但要與潘頓一爭短長，必須注意因不小心策騎而停賽呢個問題。

　　第五場三班1650米。「豁達瀟灑」今季跑3場，兩場谷中1200米及田草1400米，淨係睇米高鄭安排咩路程，已經知道未有心出擊。今次就唔同，回到主場一哩，亦唔再用華將，賽前準備做得夠足，由今仗開始已要重新留意，不出三兩場應會現形。

　　第七場一班1200米。「花月佳期」有時出閘起擒，又有時氣管多血或腳患，據手足所講，唔係咁話，呢匹馬一定級際賽有得爭。上次初跑谷草即入三甲，試準性能拿拿聲增程，大摩唔安排呢匹馬返沙田，都係貪對手冇咁強，增加勝望。

　　第八場二班1650米。「川河型駒」輸完1次又1次畀「金滿載」，試過放頭或者守有利位置，末段都係冇運行，可以講，完全是兩駒實力及進度有距離。短途冇得贏，蔡神仙都算轉型快手，安排隻馬由1200米跳上一哩，呢場係咪即刻得？希望係，但日後一哩必然比短途更勁，大家拭目以待。