車仔二線兵劏「鵝」

猪拉多纳

莫連奴拆禮物日未輸過

聖誕節開快車係英超傳統，莫連奴亦都有個傳統，就係喺拆禮物日領軍從未輸過，呢位「Boxing Day之王」今晚會帶隊喺主場恭候史雲斯，就算「寸王」派遣部分副選球員出擊，要砌低甩皮甩骨嘅「天鵝」依然綽綽有餘，1.88倍「讓主」咪錯過！（now622台周四晚11:00直播）

對於車路士球迷嚟講，莫連奴絕對係佢哋嘅聖誕老人，事關「寸王」歷嚟執教「藍戰士」從未喺拆禮物日輸波，次次Boxing Day都有分落袋，班Fans仲唔當佢係聖誕老人咩！

車路士嚟緊禮拜一凌晨會硬撼利物浦，莫帥講到明今場會派A高、伊度奧同桑馬達等副選兵落場，但呢班所謂嘅二線兵統統係世界級，戰鬥力一樣有保證。
史雲斯盧特立未打先投降

史雲斯領隊米高盧特立都知呢班「二線車仔」惡啃，賽前先係話「造訪史丹福橋不嬲惡踢」，又話「車路士嘅後備席球員都足夠令我腳震」，似乎未開波就先投降喎！查實又難怪盧特立咁騰雞嘅，皆因佢隻「天鵝」家陣天殘地缺，靈魂人物米捷要進行足踝手術面臨長抖6個禮拜，翼鋒尼敦戴亞同門將禾姆亦肯定缺陣，前中後三線都靠唔住喎！

今晚史雲斯想爆冷，就要睇韋菲特邦尼嘅造化，不過呢位科特迪瓦射手今季所攻入嘅10球當中，只係得3球係嚟自客場，一出征就腳仔軟，最弊係負責把關嘅查美爾今季平均每40分鐘就有失波，攻又唔得守又唔掂，睇怕都係難逃一劫輸鑊勁！一於撐車路士攞晒3分，過聖誕快車頭關啦！