鳳凰冇料到雄心開齋在望

猪拉多纳

年尾流流大家忙緊乜？妹頭見周圍朋友都係搞Party多，我自己就忙住預備電台頒獎禮，真係背得稿嚟，都唔得閒綵排！但妹頭今日都會返球彩台同大家睇澳職直播，雖然今日戲碼墨爾本雄心主場對威靈頓鳳凰，就好似兩弱對壘，但話唔定都踢得燦爛呢！

（有線64及203台周五下午4時30分直播）
基維爾復出逐步回勇

兩支難兄難弟喺鬥快打開勝利之門嘅競賽中，鳳凰「贏咗」，上星期主場打敗FC悉尼，全澳職得番雄心仲未贏過波。其實雄心成立至今，近幾個月都可以話係走勢最差，季初都冇諗過佢哋會做聖誕包尾，教練艾萊斯當然深受壓力。但有危就有機，我相信呢班波無論如何，喺年尾前都開到齋，陣中老大哥基維爾已經復出，除咗可以增強攻力同傳送畀大衞威廉斯，亦有助球隊穩定軍心。

大家都覺得鳳凰勢頭好，點解今仗贏唔到？其實鳳凰把握力真係好差，就如上兩仗唔係冇入波機會，但送到射空門咁滯，都飛機出界，前鋒伊菲爾仲話可能要長抖。事實上，上季至今鳳凰都未曾試過兩連勝！今日作客雄心，妹頭就投雄心信心一票啦！今日下午澳職直播見！