教頭急住開齋保飯碗

猪拉多纳

雄心萬丈捉「鳳凰」

今日澳職獨腳戲，墨爾本雄心喺主場恭候威靈頓鳳凰。鳳凰上輪主場砌低FC悉尼，取得今季聯賽首勝，弊在箭頭伊菲爾重創提早收咧，班波作客又腳軟，今輪造訪墨爾本捧唔落手，阿占睇好雄心可以順利開出2.02倍主W。（有線64及203周五下午4:30直播）
鳳凰作客例腳軟

雄心上輪喺「墨爾本打吡」不敵勝利，最大原因係守將基斯諾保上半場被逐，打亂教頭艾萊斯嘅部署，被迫換走箭頭米蘇特，最終捱打輸波。現時聯賽只係得番佢哋未開齋，艾萊斯想保住飯碗，今仗可謂非勝不可，好在大衞威廉斯同安德列米基奧連尼幾名中前場球員狀態唔錯，再加有名將基維爾鋪橋搭路，進攻火力都信得過嘅。

鳳凰雖然啱啱打開聯賽勝門，可惜佢哋作客例牌腳軟，計埋上季，最近14場客戰，鳳凰仔竟然輸足11場！上季以16球成為鳳凰首席射手嘅布洛奇，今季表現走晒樣入得嗰兩球，箭頭伊菲爾仲因為跟腱斷裂，接受手術後證實長抖8至12個月，前線削成咁，就算雄心守將基斯諾保要坐波監，鳳凰都未必佔到咩甜頭。
頂占筍盤：墨爾本雄心（主勝）