人多好辦事 曼城快車踩油撞水晶宮

猪拉多纳

英超快車最考驗球隊後備力量，富貴兵團曼城最着數，球隊有人滿之患，二線球員質素勁過唔少球隊正選人腳，即使採取輪換制，亦可保持水準。更何況副選有得上陣，必定把握機會，落力爭取表現，盡數對手。曼城可以放心踩行油搶分，今晚主場有力大勝魚腩水晶宮，增強氣勢，讓球主客和曼城讓二球，直取讓球主勝。

（now 622周六晚11時直播）
大把靚牌輪住出

曼城剛於前晚惡鬥完利物浦，估計領隊比歷連尼今仗會大規模更換正選陣容，但對佢來講，實在冇難度，皆因手上大把好牌可用。捷西斯拿華斯、占士米拿、查維亞加西亞、魯迪維爾都係獨當一面嘅球員，只因効力曼城，先至屈居後備，派佢哋擔正應付水晶宮，仍然綽綽有餘。

此外，今季高價加盟嘅黑山前鋒祖維迪已病愈，可望披甲，迪斯高正好趁阿古路養傷，全力搏殺，絕對唔介意三日兩賽，隨時愈踢愈生猛。

反觀，水晶宮兵微將寡，用來用去都係嗰班正選，遇上緊密賽程，球員真係吃不消。值得留意，水晶宮連續兩場作客，曼城繼續主場出擊，此消彼長之下，令雙方體力差距更加懸殊，水晶宮今仗凶多吉少。

比歷連尼(曼城領隊)：球員上場喺落後嘅時候都冇放棄，值得一讚，尤其係赫特，我對佢好滿意，今場波(對利物浦)證明佢仲係英格蘭最好嘅門將。

佩尼斯(水晶宮領隊)：球隊成功喺大敗畀紐卡素後反彈贏到阿士東維拉，我除咗大讚球員表現外冇其他嘢好講，球隊今場對住曼城都冇有怕。