勝利爭標心強趕絕流浪者

猪拉多纳

今日晏晝有場澳職獨腳戲，由墨爾本勝利同西悉尼流浪者合演前列大戰。勝利今季猛咁向海外球會Say No，要貨唔要錢點都要留住陣中主力，證明呢班波係幾咁有奪冠決心，今鋪主場對住爭標勁敵流浪者絕對唔衰得，梗係撐4.95倍「讓主」啦！

（有線64及203周六下午4:45直播）
拒賣尼高斯畀櫻花

營運球會係一門生意，對於勝利呢啲澳職球會，價啱嘅話就賣o架啦！偏偏你又估佢唔到，繼今夏拒絕英超球會水晶宮用100萬鎊斟介旗下悍將米利根後，日前會方又請日職嘅大阪櫻花食檸檬，死都唔肯放中場重心尼高斯，睇得出勝利係幾咁有野心。查實勝利唔放尼高斯都好正路，呢位指揮官上場先至梅開二度，幫球隊以3:1砌低雄心，由佢聯同米利根鎮守中場，為首席射手杜羅奧斯提供彈藥，就算老牌射手艾奇湯臣仲未重拾狀態，要攻破流浪者大門都綽綽有餘。

唔係話流浪者戰鬥力唔及勝利，佢哋最近仲連贏兩場聯賽添，之不過班波嘅鋒力真係幾削，11戰後只入得13球，杜米祖歷樹大招風今鋪隨時無啖好食。賽前勝利教練梅斯卡特仲話，會搵米利根同布洛斯咸專責「招呼」流浪者發電機小野伸二，有晒部署，睇怕流浪者都惡唔出樣！
頂占筍盤：墨爾本勝利（讓球主勝）