珍珠有利往績夠照

猪拉多纳

　　聖誕新年檔期，真係跑馬跑到麻木，年終賽整夠11場，馬會實行以量取勝，都無說話好講。而今期有好多馬，近期已經唔只見過1次，有剛剛跑得好、有唔好，有時最難判就係佢，太短日子再跑，係咪表現如一，唔係咁易估到！

　　第六場四班1200米。「珍珠有利」都算唔好彩，周不時抽外檔，或者陣中脫口，以致跑到唔知去邊。

　　，今次畀「珍珠有利」抽到內檔，應該好有幫助，唔好唔記得，上季佢在呢項路程僅僅追唔到匹馬係「萬事盛」，後駒今季已經執兩W，咁無理由「珍珠有利」想贏番場都難過登天？！

　　第八場三班1200米。「勁酒王」上次表現差多少，唯一藉口係耐冇出，今次相隔兩個禮拜再跑，狀態唔需要再擔心。

　　其實，我唔係幾明，點解今次隔晚賠率依然勁，話晒係處女馬，出自蔡神仙又點，佢都唔係萬能，從另一面睇，亦可視為信心飛，睇閣下點睇件事，假如跑得番當日與「步步友」埋Q表現，好有機會贏馬。

　　飲食世界轉路程搏

　　第十場二班1400米。「飲食世界」1200米跑完又跑，田谷試過晒，方仔心中有數，知道隻馬性能。今仗終於轉路程，回到田草，搵埋柏寶，一切舉動都係搏馬先兆。

　　如果論呢匹馬質素，初出可以追到匹「積多福」氣咳，二班唔會冇馬贏，呢匹馬一旦增程仲好跑，唔會將對手放在眼內。陳華棟資深評馬人