喜鵲弗爆廠受讓筍

猪拉多纳

法蘭西兵團 強隊豬頭骨

英超聖誕新年快車好戲連場，今晚紐卡素坐鎮主場火併阿仙奴，「喜鵲」今季成為強隊豬頭骨，相反阿仙奴上仗雖贏波止瀉，但演出一般，況且近年作客聖占士公園球場冇乜甜頭，讓波純粹係名牌效應，斯維認為「喜鵲」受讓筍到爆，讓球主勝捧得過。

（now 621周日晚9時30分直播）

由於上季太多新援加入，紐卡素未磨合得切淪落到護級，不過主帥柏杜今季帶領球隊撥亂反正，無論係從昆士柏流浪借來嘅射手雷米，定係卡比耶、高法蘭、穆沙施素高、賓艾化都輪流發威，自11月頭起，該隊9仗聯賽贏咗7場轟17粒，當中不乏硬嘢，車路士、熱刺及曼聯先後成為刀下亡魂，呢班「法蘭西兵團」更包辦咗當中15個入波，認真得人驚。
阿仙奴唔識輪換已搏殘

捱過早排魔鬼賽期後，阿仙奴已經殘殘哋，氣都未回得切就要出戰快車檔期，主帥雲格又唔識輪換，咁捱法鐵人都死喇，最明顯嘅例子係箭頭基奧特，於征戰頻仍下疲於奔命，已經8場冇士哥，雖然上仗擊敗韋斯咸，終止聯賽3場不勝嘅困局，但中場艾朗藍斯都傷埋，奧斯爾、梅迪薩卡等幾乎場場踢足，表現自然大打折扣。

睇番阿仙奴近3次作客紐卡素，僅得1勝2和，包括2011年先入4粒都畀「喜鵲」追平嘅經典之戰，今仗想贏都有心無力，紐卡素有得受讓梗係要讓球主勝喇。