英超四連環曼市雙雄做膽

猪拉多纳

趁大部分聯賽歇冬，Peter想同大家分析吓目前仲踢到如火如荼，而且榜首形勢大亂嘅英超，我想貼吓前四名歐聯席位嘅四連環，由曼市雙雄曼城同曼聯做膽，腳拖阿仙奴、利物浦同車路士足矣！
曼聯有條件後來居上

曼城人腳鼎盛，無敵主場失分機會甚微，基本上已夠膽講Book定咗下屆歐聯參賽資格，至於曼聯就係Peter下半季心水之選，雖然佢哋目前只排第七，不過絕對有後來居上能力，首先係佢哋實力完整，三線兵源在阿仙奴同利物浦之上，有大熟嘅頂級球星朗尼領軍，而且幾位傷兵費蘭尼同費查都陸續傷愈，球隊喺防守中場實力亦在車路士之上，Peter一個月前同訪港嘅前曼聯鋼門舒米高傾開，佢話曼聯「後費格遜時代」攞少次冠軍冇問題，但對下屆歐聯席位志在必得，莫耶斯上場後要時間適應新工作，亦未出手買人，高層已經落柯打開水喉，球隊將有新兵加盟，前景看好。

至於配卻方面，阿仙奴喺奧斯爾加盟後激活全隊，佢同艾朗藍斯、韋舒亞及法米尼組成黃金中場，戰鬥力大幅提升；利物浦有個順到極嘅蘇亞雷斯，唔可以睇小；至於車路士有莫連奴領軍，轉會市場重開後會有大動作，爭四強要預埋佢。
祖記拜仁聖日耳門超晒

Peter現時經常講意甲同法甲，亦經常有睇德甲，呢三個聯賽冇英超咁複雜，意甲祖雲達斯雖然只領先羅馬五分，但計人腳根本高好多，派路同維達爾領軍嘅中場既有創意亦夠硬淨，配合大熟當起嘅保羅普巴，呢條中場喺意甲殺晒，加上前有泰維斯同洛蘭迪，後有鋼門保方，奪冠呼聲高唱入雲，至於德法兩地就唔使多講，拜仁慕尼黑同巴黎聖日耳門都大超班，冠軍非佢哋莫屬。　　
金句：既準又經濟嘅英超四連環！