曼聯熱刺元旦大戰

猪拉多纳

韋碧克艾迪巴約雙槍駁火

英超聖誕新年快車嚟到尾站，重頭戲曼聯坐鎮主場硬撼熱刺，經過頻密賽程，雙方中後場都傷兵滿營，防線隨時大穿窿，曼聯近期新年第一擊都演大騷，適逢兩軍箭頭韋碧克及艾迪巴約弗到爆，齊齊喺2014年首戰送份「大」禮畀粉絲，入球大有買趁早。

（now 621周四凌晨1時30分直播）

近期曼聯防線極度不穩，好似早前作客弱旅侯城，經驗較多嘅莊尼伊雲斯竟然喺解圍嗰陣，衰到將個波踢畀對手變成「助攻」導致失波，基斯史摩寧又慌失失，非常牙煙，防中菲爾鍾斯、費蘭尼及右閘拉菲爾達施華又告受傷，儘管兩大防中卡域克同費查相繼復出，但啱啱好番明顯未弗，隨時令防線漏洞暴露人前。熱刺亦唔好得幾多，守將卡保奧、維頓漢及防中辛度雲尼亞里全部做晒「十字兵」，中堅焗用轉身極慢嘅戴臣拍住經常甩波嘅基利捷斯，想唔失波都幾難喇。
紅魔新年首戰旺「大」

好彩，近日被扶正嘅熱刺主帥舒活崇尚進攻，上任後即復用高大中鋒艾迪巴約，佢餓波太耐勁搶韁，唔單止重拾射門鞋，仲同拍檔蘇爾達杜擦出火花。除此之外，舒帥前仗對西布朗試過唔擺防中，上仗迎戰史篤城用番硬淨嘅迪比利，呢位比利時國腳遠射腳頭煞食，加埋擅於組織兼罰球了得嘅基斯甸艾歷臣，火力全開唔係人咁品。

另邊廂曼聯雖仍有前鋒尹佩斯受傷，但小將韋碧克上晒身，之前四仗聯賽省四粒，當中有三球係先開紀錄，由專嘥「餐士」嘅敗家仔變身關鍵先生，帶領球隊全部贏晒，腳風順到冇朋友，上仗倦勤嘅王牌朗尼據報今仗可趕及復出，佢兩個拍住上，實搞到熱刺風聲鶴唳，況且紅魔喺新年首戰勁旺大盤，近5季有4次大手交易，捧入球大更加穩陣。
曼聯近5季新年第一擊戰績

1-1-13 聯賽 作客 4:0 韋根

5-1-12 聯賽 作客 0:3 紐卡素

1-1-11 聯賽 作客 2:1 西布朗

3-1-10 英足盃 主場 0:1 列斯聯

4-1-09 英足盃 作客 3:0 修咸頓

莫耶斯(曼聯)：球員近排表現好好，尤其係韋碧克，我哋從來都冇放棄過爭奪英超冠軍，今場對熱刺更要用贏波嚟證明我哋已經返晒嚟！

舒活(熱刺)：即使今場對手係曼聯，我哋都會繼續大打進攻足球，唔可以因為佢哋近排氣勢好就縮，要Show畀佢哋睇到我哋嘅風格﹗