曼聯 熱刺大爆發

猪拉多纳

2014衝出低谷！

英超快車最後一站，曼聯主場鬥熱刺！2013年，紅魔同熱刺同陷低谷，好彩去到年尾，曼聯終回勇連贏6場，對家熱刺喺新帥舒活上任後亦回復生氣，2014年首場重頭戲，一於捧1.65倍入球大啦！

（now621台周四凌晨1:30直播）
朗尼尹佩斯復出

曼聯上仗小勝諾域治1粒，贏波過程雖然冇說服力，但發揮得唔好都照開W，呢啲咪就係強隊DNA囉。

數吓手指，紅魔已經連贏6場，狀態一流，況且《每日郵報》前日仲話，因大腿傷缺陣5場嘅荷蘭射手尹佩斯已經復操，佢同朗尼將會齊齊復任正選，呢對「魔鋒」今季合力貢獻咗16個聯賽「士哥」，加埋刑滿復出嘅路爾斯華倫西亞喺邊線做助攻，鋒力梗係夠晒保證啦！
熱刺舒活話明喪攻

曼聯重返勝軌，熱刺亦有番起色。咪以為舒活喺球員時代踢防中就注重防守，查實呢位熱刺新帥不知幾進取，上任後捨棄舊帥保亞斯嘅單箭頭陣式，放艾迪巴約出嚟踢番442，結果呢對前鋒組合近4場就炮製咗4個入波，證明「黑白雙煞」有化學作用！

仲有呀，熱刺上仗以3:0大炒史篤城，係舒活坐正後嘅首勝，有份入波嘅迪比利前晚仲大讚「老細」套戰術使得，舒活自己賽前亦都走出嚟激勵士氣：「我鍾意冒險，唔會死守，既然上季熱刺可以贏曼聯3:2，自1989年以嚟首次喺奧脫福贏波，今場波點解唔得先？」既然兩軍將帥都雄心壯志玩喪攻，呢場「大」龍鳳實做得成啦！
Data King 兩軍對賽例開入球騷

雙方近5次交手有4次開大。

曼聯對上15戰未試過半場落後。

熱刺近8仗有7場開大。