熱刺當旺受讓抵撐

猪拉多纳

阿仙奴殘陣惡唔出樣

英格蘭足總盃第3圈邊場大戰最矚目，唔使問都知梗係北倫敦打吡阿仙奴主場火併熱刺，正所謂仇人見面分外眼紅，適逢兵工廠傷兵一大籮，熱刺則易帥後全面反彈，啱啱作客奧脫福連曼聯都砌低，士氣正值全季高點，仲唔趁宿敵病到死死吓踩多兩腳咩？加上倒戈嘅艾迪巴約弗爆趕得切復出，火力全開之下兼有受讓之利，讓球客勝有1.85倍非常值博。

（now 621、633及660周日凌晨1時15分直播）
傷兵滿營想搏都難

阿仙奴與熱刺嘅恩怨真係一匹布咁長，因此兩軍對碰都例必火花四濺，唔使擔心佢哋會揸流攤。不過時移世易，阿仙奴雖然貴為英超一哥，但依家傷兵滿營，例如艾朗藍斯、基蘭基比斯、阿歷士張伯倫全部因傷倦勤，連後備中鋒賓特拿上仗入波後亦觸傷足踝，今仗唔使預佢。

雖然主帥雲格表示中場核心奧斯爾可復出，但佢哋喺聯賽幾經辛苦重登榜首，於板櫈深度不足嘅劣勢下，雲帥難免要作出取捨，隨時收起奧斯爾而改派副選應戰，加上咁多傷兵，想搏亦有心無力。反觀熱刺自從扶正舒活為帥後，近4仗未輸過之餘，上仗聯賽作客奧脫福更擊敗曼聯，眾將明顯重拾信心，走出早前慘敗畀曼城及利物浦嘅谷底。
艾迪巴約趕及復出

其中遭前任主帥保亞斯雪藏嘅中鋒艾迪巴約，獲舒活解凍後場場搏甩髀，近5場怒省4粒弗到震，被舒帥形容為銳不可當，雖然上仗傷出，但據報佢趕及於呢場大戰復出，睇番呢位兵工廠叛徒近3次倒戈轟入兩球，加上呢位「大細路」已經修心養性，，專心比賽之下相信表現會更佳。

再加埋蘇爾達杜、迪比利、基斯甸艾歷臣及艾朗連儂嘅支援，一於趁你病攞你命剷平兵工廠，仲有得受讓真係好筍，讓球客勝咪走雞啦！

阿仙奴領隊雲格：雖然奧斯爾已經好番，但我唔打算畀佢冒險出場，雖然我哋有大堆傷兵，人人都攰爆，今仗對熱刺非常惡踢，好彩對手情況亦差唔多，無論如何我哋會盡力爭勝。

熱刺領隊舒活：雖然我哋有9名球員受傷，但艾迪巴約趕得切復出真係天大嘅喜訊，佢真係一名頂級射手，而且近況又弗，等閒後衞好難阻擋得住佢，呢場北倫敦打吡肯定好精彩。